Lwmp Mam – Cymraeg (BCC193) (Mummy's Lump, Welsh)

Lwmp Mam yw’r llyfr cyntaf erioed yn y DU i helpu plant ifanc y mae eu mamau wedi cael diagnosis o ganser y fron. Gallwch archebu eich copi rhad ac am ddim yma. Meddai’r Awdur Gillian Forrest, Seiciatrydd Plant Ymgynghorol ac Uwch Gymrawd Ymchwil ym Mhrifysgol Rhydychen, a gafodd ddiagnosis o ganser y fron ym 1990 pan oedd ei phlant yn bump a saith oed: ‘Er fy mod yn seiciatrydd plant profiadol, doeddwn i ddim yn siŵr sut i siarad gyda’m plant am fy niagnosis. Ni ofynnodd neb a oedd egluro’r hyn oedd yn digwydd i’m plant yn achosi problem i mi, roedd popeth yn canolbwyntio ar fy nghyflwr.’

Er mwyn helpu rhieni eraill sy’n wynebu’r broblem, penderfynodd Gillian ysgrifennu llyfr wedi’i anelu at blant dan chwech oed, a fyddai’n egluro’r hyn roedd eu mam yn mynd drwyddo. Mae Lwmp Mam yn dilyn hynt Eli a Jac wrth iddyn nhw ddysgu am ddiagnosis a thriniaeth eu mam ar gyfer canser y fron. Mae’n edrych ac yn teimlo fel clasur o lyfr stori i blant, gyda darluniau gan Sarah Garson.